Niderland qarşıdakı on il ərzində tropik meşələrin qorunması üzrə beynəlxalq maliyyə mexanizminə – “Tropical Forest Forever Facility” (TFFF) təşəbbüsünə 500 milyon dollaradək vəsait yatırmaq niyyətindədir. Təşəbbüsün məqsədi öz ərazisində meşə sahələrini qoruyub saxlayan ölkələr üçün uzunmüddətli maliyyə mənbəyi yaratmaqdır.
NTV Niderland hökumətinə istinadla xəbər verir ki, ölkənin ayırmaq istədiyi vəsait hələlik şərti xarakter daşıyır. Niderland digər ölkələr və Dünya Bankı ilə birlikdə mexanizmin hazırlanması üzərində işi davam etdirir.
Braziliyanın irəli sürdüyü təşəbbüs tropik meşələri qoruyub saxlayan ölkələrə hər il maliyyə vəsaiti ödənilməsini nəzərdə tutur. Ayrı-ayrı təbiəti mühafizə layihələrinin maliyyələşdirilməsindən fərqli olaraq, bu mexanizm meşə örtüyünün qorunması sahəsində təsdiqlənmiş nəticələrə görə pul mükafatını nəzərdə tutur.
Fondun hədəf həcmi 125 milyard dollardır. Bu məbləğin 100 milyard dollarının özəl investorlar hesabına cəlb edilməsi planlaşdırılır. Söhbət artıq toplanmış vəsaitdən deyil, qarşıya qoyulmuş maliyyə hədəfindən gedir. Niderland hökumətinin məlumatına görə, ölkənin institusional investorları da təşəbbüsə qoşulmağa maraq göstəriblər.
Cəlb edilən vəsaitin maliyyə aktivlərinə yatırılması, əldə olunan gəlirin bir hissəsinin isə tropik meşələri qoruyub saxlayan ölkələrə ödənişlər üçün yönəldilməsi nəzərdə tutulur. Bununla belə, maliyyələşdirmənin həcmi investisiyaların gəlirliliyindən və müəyyən edilmiş tələblərin yerinə yetirilməsindən asılı olacaq.
Meşə sahələrinin vəziyyətinə peyk məlumatları vasitəsilə nəzarət edilməsi planlaşdırılır. Hər hektar üçün illik ödənişin təxminən 4 dollar olacağı ehtimal edilir.
Meşələrin mühafizəsində iştirak edən yerli xalqların və icmaların dəstəklənməsinə xüsusi diqqət yetirilir. Mexanizmin şərtlərinə əsasən, ölkələrə ödənilən vəsaitin azı 20 faizinin bu əhali qruplarına yönəldilməsi nəzərdə tutulur.
TFFF karbon bazarlarından da fərqlənir. Belə ki, bu mexanizm çərçivəsində karbon və ya biomüxtəliflik kreditlərinin buraxılması nəzərdə tutulmur. Təşəbbüsün məqsədi təbiətin mühafizəsi üzrə tədbirlər üçün mövcud maliyyə mənbələrini tamamlayan əlavə mexanizm yaratmaqdır.
Niderland bu təşəbbüsə qoşulacağını açıqlayan ölkələr sırasına daxil olur. Həmin ölkələr arasında Braziliya, Norveç, İndoneziya, Almaniya, Fransa və Böyük Britaniya da var.
Mexanizmin hazırlanmasının gələn ilin ortalarınadək başa çatdırılması planlaşdırılır. Bundan sonra onun tam fəaliyyətə başlaması mümkün olacaq.
NTV canlı
Radio canlı
Nuhçıxan