Fransanın 2027-ci il büdcəsi ilə bağlı hökumətin hazırladığı layihənin təqdimatına təxminən bir ay qalmış mediada bir sıra mümkün tədbirlər barədə məlumatlar yayılıb. Əməkhaqqı yığımlarının vergiyə cəlb edilməsi, yüksək gəlirli pensiyaçıların pensiyalarının indeksasiyasının dəyişdirilməsi, əmək qəzası və peşə xəstəlikləri üzrə gündəlik ödənişlərin yuxarı həddinin azaldılması və pensiyaçılar üçün 10 faizlik vergi güzəştinə yenidən baxılması kimi variantlar müzakirələrə səbəb olub.
NTV xəbər verir ki, Baş nazir Sebastyən Lökornü bu məlumatlara münasibət bildirərək, mediada yayılan məlumatların hökumətin rəsmi qərarları olmadığını vurğulayıb. Onun sözlərinə görə, bu məlumatlar nə elan, nə də hökumətin sınaq xarakterli addımlarıdır və 2027-ci il büdcəsi hələ hazırlanma mərhələsindədir.
İqtisadiyyat naziri Rolan Lekür isə RTL-ə açıqlamasında bəzi pensiyaların indeksasiyasının dəyişdirilməsinin hökumətin nəzərdən keçirdiyi variantlardan biri olaraq qaldığını təsdiqləyib. Nazir xəbərdarlıq edib ki, gələn il heç bir tədbir görülməsə, büdcə kəsiri təxminən ÜDM-in 6 faizinə çata bilər.
S.Lökornü isə yekun qərarların yalnız hökumət daxilində müzakirələr başa çatdıqdan sonra açıqlanacağını bildirib. Baş nazirin sözlərinə görə, arbitraj qərarları qəbul edildikdə elan olunacaq.
NTV canlı
Radio canlı
Nuhçıxan