İsrailli alimlər bitkilərdə tək bir genetik nəzarət nöqtəsini dəqiq tənzimləməklə daha ətirli, dadlı və qida dəyəri yüksək məhsullar əldə etməyin yolunu tapdıqlarını açıqlayıblar.
NTV İsrailin TPS-IL informasiya agentliyinə istinadla xəbər verir ki, tədqiqat Yerusəlim Yəhudi Universitetinin alimləri tərəfindən aparılıb. Araşdırmaya görə, alimlər bitkinin genlərinə kənardan heç bir DNT əlavə etmədən onun keyfiyyətini yaxşılaşdıra biliblər. Onlar xüsusi “CRISPR” üsulu ilə bitkidə müəyyən bir fermentin fəaliyyətini zəiflədərək ətir, dad və faydalı xüsusiyyətlərə cavabdeh maddələrin miqdarını artırıblar.
Təcrübələr petuniya və kahı üzərində aparılıb. Nəticədə çiçəklərdə daha güclü ətir və iri ölçü, kahıda isə daha yüksək antioksidan səviyyəsi müşahidə olunub.
Tədqiqatçılar bildirirlər ki, bu yanaşma gələcəkdə daha keyfiyyətli və sağlam meyvə-tərəvəzlərin istehsalına imkan verə bilər.
NTV canlı
Radio canlı
Nuhçıxan