NTV xəbər verir ki, Naxçıvan Muxtar Respublikası Təhsil naziri Elxan Nəcəfov Culfa şəhər 3 nömrəli tam orta məktəbdə Vətən müharibəsi şəhidi Kənan Rzayevin oğlu Əli Rzayevlə görüşüb, onun təhsili və məktəb həyatı ilə maraqlanıb, şəhid övladına hədiyyə təqdim edib.
Qeyd edək ki, Kənan Rzayev 2020-ci il sentyabrın 27-də başlayan Vətən müharibəsində kəşfiyyatçı-istehkamçı kimi iştirak edib. Füzulinin və Xocavəndin azadlığı uğrunda döyüşüb.21 oktyabr 2020-ci ildə Xocavənd rayonunun Tuğ kəndi istiqamətində döyüş tapşırığının yerinə yetirilməsi zamanı şəhid olub. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin sərəncamlarına əsasən Kənan Rzayev ölümündən sonra "Vətən uğrunda", "Şuşanın azad olunmasına görə", "Hərbi xidmətlərə görə", "Xocavəndin azad olunmasına görə", "Füzulinin azad olunmasına görə" medalları ilə təltif edilib.
Məktəbin kollektivi ilə də görüşən nazir yeni tədris ili münasibətilə təbriklərini çatdırıb, tədrisin səmərəli təşkili ilə bağlı tövsiyə və tapşırıqlarını verib.
NTV canlı
Radio canlı
Nuhçıxan