Avropa İttifaqı (Aİ) 2028-2034-cü illəri əhatə edən çoxillik maliyyə mexanizmi (MFF) çərçivəsində miqrasiya, sərhəd idarəçiliyi, viza siyasəti və daxili təhlükəsizlik sahələrində maliyyə dəstəyini müəyyən edən qaydalara dair danışıqlar mövqeyini razılaşdırıb.
NTV xəbər verir ki, Aİ-nin mövqeyi üzv ölkələrə miqrasiya və sığınacaq üzrə ümumi sistemin həyata keçirilməsinə, qanuni miqrasiyanın təşviqinə, inteqrasiya və sosial inklüzivliyə dəstək verməyə imkan yaradacaq. Sənəd, həmçinin üzv dövlətlər arasında həmrəyliyin və məsuliyyətin ədalətli bölüşdürülməsinin gücləndirilməsini nəzərdə tutur.
Yeni maliyyə alətləri Aİ-nin xarici sərhədlərinin daha səmərəli idarə olunmasına, viza prosedurlarının təkmilləşdirilməsinə və Şengen zonasının fəaliyyətinin qorunmasına xidmət edəcək. Eyni zamanda, qeyri-qanuni miqrasiyaya qarşı mübarizə, təhlükəsiz və ləyaqətli geri qayıdış, eləcə də reinteqrasiya tədbirləri dəstəklənəcək.
Daxili təhlükəsizlik sahəsində maliyyələşmə terrorizm, zorakı ekstremizm, mütəşəkkil cinayətkarlıq və kibercinayətkarlıqla mübarizə, məlumat mübadiləsinin genişləndirilməsi və hüquq-mühafizə əməkdaşlığının gücləndirilməsinə yönələcək. Yeni prioritetlərdən biri kritik infrastrukturun düşmən yönümlü fəaliyyətlərə qarşı dayanıqlığının artırılması olacaq.
2021-2027-ci illər büdcə dövründən fərqli olaraq, vəsaitlərin bölüşdürülməsi milli və regional tərəfdaşlıq planları vasitəsilə həyata keçiriləcək. Hər bir üzv dövlət investisiya və islahatlarını əhatə edən vahid kompleks plan hazırlayacaq.
NTV canlı
Radio canlı
Nuhçıxan