Naxçıvan Dövlət Universitetində “Naxçıvan Qaziləri” İctimai Birliyinin təşkilatçılığı ilə Vətən müharibəsinin itkin şəhidi İbrahim Vəlizadəyə həsr olunmuş “Murovdan gələn səda” kitabının təqdimat mərasimi keçirilib. Tədbirdə şəhid ailələri, qazilər, müharibə iştirakçıları, dövlət nümayəndələri və tələbələr iştirak ediblər.
Əvvəlcə ümummilli lider Heydər Əliyevin və Vətən uğrunda canından keçən şəhidlərimizin xatirəsi bir dəqiqəlik sükutla yad edilib, Dövlət Himni səsləndirilib.
Tədbirdə çıxış edən şəhid ailələrinin üzvləri, Naxçıvan Dövlət Universitetinin rektoru və “Şərq qapısı” qəzetinin müavini bildiriblər ki, qədim Naxçıvan torpağının igid oğulları Vətən müharibəsi şəhidlərinin hər biri xalqımızın yaddaşında əbədi olaraq qalacaq. Onların həyat yolu, qəhrəmanlığı və döyüş yolu gələcək nəsillər üçün bir örnəkdir. Bu qəhrəmanlıq hekayələrinin qələmə alınması və gələcək nəsillərə ötürülməsi olduqca vacibdir. Belə mötəbər tədbirlərin ali təhsil ocağında keçiriliməsi tələbələr üçün əsl nümunədir.
Qeyd olunub ki, “Şərq qapısı” qəzeti kollektivi daim vətənpərvərlik ruhunda kitablar və məqalələr qələmə alır. Bu fəaliyyətin zirvəsində “100 ilin qəhrəmanları” kitab dayanır.
Sonra kitabın müəllifi Ramiyə Əkbərova nəşri şəhidin valideyinlərinə təqdim edib. İtkin şəhid İbrahim Vəlizadənin atası Səməd Vəlizadə tədbirin təşkil edilməsində göstərilən dəstəyə, kitabın ərsəyə gəlməsində çəkilən zəhmətə görə bir sıra şəxslərə fəxri fərman təqdim edərək öz təşəkkürünü bildirib.
Tədbirin bədii hissəsində Naxçıvan Dövlət Universitetinin xor kollektivi və Altai teatrının hazırladığı kompozisiya təqdim olunub. Şəhidlərin şərəfli döyüş yolunu əks etdirən kompozisiya böyük maraqla qarşılanıb.
Fariz Əhmədov
NTV canlı
Radio canlı
Nuhçıxan