Xerson vilayətinin Oleşki şəhərində mülki əhalinin təxliyəsi üçün humanitar əməliyyat aparılır. Şəhəri tərk etmək istəyənlər üçün azı 750 nəfəri daşıya bilən iyirmi beş avtobus hazırlanıb. Rusiya və Ukraynanın insan hüquqları üzrə müvəkkilləri təxliyə karvanı ilə birlikdə Oleşkiyə gedirlər.
NTV xəbər verir ki, Rusiya ombudsmanı Yana Lantratova bu barədə “Vesti” informasiya xidmətinə müsahibəsində danışıb.
O bildirib ki, hər iki tərəf humanitar missiya üçün əldə edilən razılaşmalara tam əməl edir. Atəşkəs davam edir və heç bir insident qeydə alınmayıb.
Humanitar əməliyyatda ehtiyacı olanlara kömək göstərməyə hazır olan 50-dən çox tibb mütəxəssisi iştirak edir. Sakinlərin təxliyəsi ilə yanaşı, ərzaq, dərman və digər zəruri ləvazimatların çatdırılması da planlaşdırılır.
İnsanların təhlükəsizliyinə xüsusi diqqət yetirilir. Bir gün əvvəl mütəxəssislər karvanın hərəkət edəcəyi yolların minalardan təmizlənməsini başa çatdırıblar. Lantratovanın sözlərinə görə, bu iş itkisiz ötüşməyib: bir sapyor və daha bir nəfər həlak olub. Bugünkü əməliyyat, ABŞ-nin birinci xanımı Melaniya Trampın vasitəçiliyi ilə Rusiya ilə Ukrayna arasında humanitar razılaşmaların nəticəsidir.
Məhz onun iştirakı uzun müddətdir döyüş zonasında ilişib qalan Oleşki şəhərinin mülki sakinlərinin acınacaqlı vəziyyətinə daha çox diqqət çəkib. Humanitar dəhlizin yaradılması məsələsi Rusiya və Ukrayna tərəflərinin nümayəndələri tərəfindən Amerikanın vasitəçiliyi ilə müzakirə edilib.
Razılaşmalar humanitar nəqliyyat vasitələrinin təhlükəsiz keçidini, əhaliyə yardım çatdırılmasını və şəhəri tərk etmək istəyənlərin imkanlarını təmin etmək üçün müvəqqəti atəşkəsi nəzərdə tutur.
Atəşkəs oktyabrın 27-də Moskva vaxtı ilə saat 04:00-da başlayıb və razılaşmalara əsasən, 1 noyabr tarixinə qədər qüvvədə qalacaq.
NTV canlı
Radio canlı
Nuhçıxan