Naxçıvan Muxtar Respublikasının Bakı şəhərindəki daimi nümayəndəliyində görkəmli oftalmoloq alim, akademik Zərifə xanım Əliyevanın anadan olmasının 103-cü ildönümünə həsr olunmuş anım tədbiri keçirilib.
Nümayəndəlikdən NTV-yə bildiriblər ki, tədbirdən əvvəl daimi nümayəndəliyin rəhbəri Bəxtiyar Əsgərov Fəxri xiyabanda müasir müstəqil Azərbaycan dövlətinin memarı və qurucusu, ümummilli lider Heydər Əliyevin və akademik Zərifə Əliyevanın məzarını ziyarət edib, daimi nümayəndəliyin kollektivi adından görkəmli alimin məzarı üzərinə gül dəstəsi qoyub.
Daha sonra daimi nümayəndəliyin kollektivi ilə akademik Zərifə Əliyevanın anadan olmasının 103 illiyinə həsr edilmiş “Böyük alim, vəfalı ömür-gün yoldaşı, qayğıkeş ana” mövzusunda dəyirmi masa təşkil olunub.
Tədbirdə əvvəlcə Azərbaycanın ərazi bütövlüyü, işğal altındakı torpaqlarımızın azad edilməsi uğrunda gedən döyüşlərdə şəhid olmuş qəhrəman Vətən övladlarının, həmçinin akademik Zərifə xanım Əliyevanın əziz xatirəsi bir dəqiqəlik sükutla yad edilib.
Tədbirdə çıxış edənlər akademikin zəngin elmi irsindən, Azərbaycan tibb elminə verdiyi töhfələrdən və onun yüksək insani keyfiyyətlərindən bəhs ediblər. Zərifə Əliyevanın həyat və fəaliyyəti gənc nəsillər üçün örnək kimi dəyərləndirilib.
NTV canlı
Radio canlı
Nuhçıxan