Rumıniyada minlərlə fermer ölkənin qoyunçuluq və keçiçilik sektorunda yaranmış böhranla əlaqədar iyulun 30-da Buxarestdə hökumət binası qarşısında kütləvi etiraz aksiyası keçirəcək.
NTV xəbər verir ki, Rumıniya mətbuatının yaydığı məlumata görə, aksiyada ölkənin müxtəlif bölgələrindən təxminən 6500 fermerin iştirakı gözlənilir. Etirazçılar hökumətdən qoyunçuluq sektorunun xilas edilməsi, ixracın bərpası və fermerlərə dəstək tədbirlərinin görülməsini tələb edəcəklər.
Məlumata əsasən, etiraz aksiyası iki mərhələdə keçiriləcək. İlk olaraq saat 10:00-dan 13:00-dək təxminən 1500 fermer Milli Baytarlıq-Sanitariya və Qida Təhlükəsizliyi İdarəsinin binası qarşısında toplaşacaq. Daha sonra iştirakçılar təşkil olunmuş yürüşlə Qələbə meydanına hərəkət edəcək və saat 10:00-dan 17:00-dək hökumət binası qarşısında ümumilikdə 5 minə yaxın nümayişçinin iştirakı ilə genişmiqyaslı etiraz keçiriləcək.
Etirazın təşkilatçıları bildirirlər ki, Rumıniyanın qoyunçuluq sektoru son onilliklərin ən ağır böhranını yaşayır. Xırdabuynuzlu heyvanların taunu ilə əlaqədar tətbiq edilən məhdudiyyətlər nəticəsində diri heyvan ixracı dayandırılıb, minlərlə təsərrüfat ciddi maliyyə itkiləri ilə üzləşib və çoxsaylı fermer təsərrüfatı iflas təhlükəsi qarşısında qalıb. Onların sözlərinə görə, mövcud vəziyyət kənd təsərrüfatının bu sahəsində çalışan minlərlə ailənin gələcəyini təhlükə altına qoyur.
Fermerlər bildirirlər ki, son aylarda aidiyyəti dövlət qurumlarına çoxsaylı müraciətlər, təkliflər və xəbərdarlıqlar göndərsələr də, əsas problemlərin həlli istiqamətində nəticə əldə olunmayıb. Etirazçılar ixrac bazarlarının yenidən açılmasını, zərərçəkmiş təsərrüfatlara maliyyə kompensasiyasının ödənilməsini, baytarlıq məhdudiyyətlərinin yenidən nəzərdən keçirilməsini və heyvandarlıq sektorunun dəstəklənməsi üçün təcili tədbirlər proqramının hazırlanmasını tələb edirlər.
Rumıniya Avropa İttifaqında qoyunçuluq təsərrüfatına görə aparıcı ölkələrdən biridir və diri heyvan, ət və süd məhsullarının ixracı ölkənin aqrar sektorunda mühüm yer tutur. Sektor nümayəndələri hesab edirlər ki, mövcud böhranın uzun müddət davam etməsi həm kənd təsərrüfatı istehsalına, həm də ölkənin ixrac potensialına ciddi mənfi təsir göstərə bilər.
Qeyd edək ki, iyulun 30-na planlaşdırılan etiraz aksiyası son illərdə Rumıniyada heyvandarlıq sektorunun təşkil etdiyi ən genişmiqyaslı nümayişlərdən biri hesab olunur və təşkilatçılar hökumətlə konstruktiv dialoq başlanmayacağı təqdirdə etirazların davam etdiriləcəyini bildirirlər.
NTV canlı
Radio canlı
Nuhçıxan