ABŞ nəşri: İran raket bazalarını və infrastrukturu sürətlə bərpa edir

İsrail və Qərb rəsmilərinin məlumatlarına, habelə peyk görüntülərinə görə, İran yeraltı raket bazalarından və körpülərdən tutmuş istehsal müəssisələrinə və limanlarına qədər müharibədən zərər çəkmiş infrastrukturu sürətlə bərpa edir.

NTV xəbər verir ki, “The Wall Street Journal” nəşrində dərc olunan materiala görə, yenidənqurma işlərinin sürətli tempi bəzi İsrail rəsmiləri arasında narahatlıq doğurub və onlar bunun aylarla davam edən intensiv hava hücumlarına baxmayaraq İranın dözümlülüyünü vurğuladığını bildiriblər.

İranın qərbindən gələn peyk görüntüləri mart ayında raket bazasına zədələnmiş tunel girişlərini və giriş yollarını göstərib, lakin həftələr sonra çəkilmiş fotoşəkillər yeni asfaltlanmış yolları və yenidən qurulmuş girişləri əks etdirib.

Başqa bir nümunədə İran ekipajları İsrail hücumları nəticəsində vurulan körpünü bir neçə gün ərzində təmir edib və bu da hücumların effektivliyi ilə bağlı suallar doğurub.

Bu arada, iyulun əvvəlindən olan peyk görüntüləri Xəzər dənizinin Bəndər Ənzəli limanında İİKK ilə əlaqəli gəmiqayırma zavodunda qismən yenidənqurma işlərini göstərib.

Ekspertlər qeyd ediblər ki, İran ehtiyatlarını yenidən bərpa edir, həmçinin çox təsirli sənayeləşmə və yenidənqurma imkanlarına malikdir.

“Məlum oldu ki, İranda raketlərin bitməsi və ya əhəmiyyətli dərəcədə azalması ilə bağlı şayiələr yanlış imiş”, - deyə ABŞ-da yerləşən Raket Müdafiəsi Alyansının baş analitiki Tal İnbar bildirib.

Peyk görüntüləri Dezful raket bazasının girişlərinin hava hücumları nəticəsində dağılmasından bir neçə ay sonra orada qazıntı işlərinin aparıldığını göstərir. Təsvirlər, həmçinin digər hərbi obyektlərdə də yenidənqurma işlərini, Kirmanşah yaxınlığındakı raket bazasında yolların təmirini və tunel girişlərinin yenidən açıldığını göstərilir.

Britaniya Kral Kollecinin hesabatına görə, ayrı-ayrı görüntülərdə Tehran yaxınlığındakı “Raja Shimi Industries” müəssisəsində qismən yenidənqurma işləri göstərilir. Bu müəssisədə yeni tikilmiş bir neçə tikili də daxil olmaqla, raket komponentləri istehsal etdiyi güman edilir.

Kral Kollecinin və Mərkəzi Kəşfiyyat Agentliyinin sabiq analitiki Cim Lamson bildirib: “Raket istehsalı üçün tələb olunan daha mürəkkəb komponentlər istehsal edən bəzi müəssisələrin bərpası aylar çəkə bilsə də, İranın qısa müddətdə yüzlərlə yeni raket və dron yığmaq üçün istifadə ediləcək yeraltı ehtiyatları ola bilər”.