Fransada davam edən güclü istilər məktəblərin işinə ciddi təsir göstərib. Eyni zamanda, elektrik şəbəkəsi operatoru “Enedis” mümkün nasazlıqlar və elektrik kəsintiləri barədə xəbərdarlıq edib.
NTV xəbər verir ki, təhsil naziri Eduard Jefrenin açıqlamasına görə, bu bazar ertəsi ölkədə 1352 təhsil müəssisəsi isti hava səbəbindən bağlanıb. Bundan əlavə, 4442 müəssisə yüksək temperaturla mübarizə aparmaq üçün xüsusi tədbirlər görüb.
İsti hava dalğası imtahanların təşkilinə də təsir edib. Nazir bildirib ki, şifahi imtahanlarda iştirak etməli olan 5233 namizəd ya həftə ərzində, ya da gələn həftənin əvvəlində yenidən imtahana çağırılacaq.
Məktəblərdə kondisioner məsələsinə toxunan nazir bildirib ki, dövlət daha çox binaların izolyasiyası, soyutma sistemlərinin yaxşılaşdırılması və uyğunlaşdırılmasına üstünlük verir. O, həmçinin xatırladıb ki, Fransadakı təxminən 60 min təhsil müəssisəsi dövlətə deyil, yerli idarəetmə orqanlarına məxsusdur və hökumət bu sahəyə illərdir maliyyə dəstəyi göstərir.
Eyni zamanda, elektrik şəbəkəsini idarə edən “Enedis” şirkəti həddindən artıq temperaturun yaratdığı mümkün nasazlıqlar barədə xəbərdarlıq edib. Şirkət yerli səviyyədə yeraltı kabellərdə elektrik kəsintiləri riskinin olduğunu bildirib.
Fransa artıq bir neçə gündür ölkənin böyük hissəsini əhatə edən güclü istilərlə üz-üzədir. Bəzi yerlərdə temperatur 43 dərəcəni keçib. Ölkədə təcili yardıma zənglər 30 faiz artıb. Bu vəziyyət dövlət qurumlarını xidmətlərin işini uyğunlaşdırmağa və ən çox risk altında olan əhali üçün profilaktik tədbirləri gücləndirməyə məcbur edib.
NTV canlı
Radio canlı
Nuhçıxan