Anaklaudia Rossbax: Mənzil təminatı ilə bağlı strukturlaşdırılmış iştirakçı idarəetmə sxemlərinə ehtiyacımız var

Sadəcə evlər tikməklə iş bitmir, işlək sistemlər qurulmalı, icmalar, şəhərlər, daxili birlik və sosial müqavilə yaradılmalıdır.

NTV xəbər verir ki, bunu BMT-nin Məskunlaşma Proqramının (UN-Habitat) icraçı direktoru Anaklaudia Rossbax Ümumdünya Şəhərsalma Forumunun 13-cü sessiyası (WUF13) çərçivəsində keçirilən QHT forumunda deyib.

"Bu 50 il ərzində öyrəndiyimiz bir məqam isə odur ki, bu tapşırıq tək bir qurumun öhdəsindən gələ bilməyəcəyi qədər nəhəngdir. Biz öyrəndik ki, şəhərsalma planlarımızın iştirakçılıq prinsiplərinə əsaslanmasını təmin etmək üçün yerli və şəhər səviyyəsində birlikdə işləməliyik. Yerli səviyyədə müxtəlif sektorları bir araya gətirən dayanıqlı, yaxşı strukturlaşdırılmış iştirakçı idarəetmə sxemlərinə ehtiyacımız var".

İcraçı direktor vurğulayıb ki, mənzil və şəhərsalma siyasətinin hazırlanması, ərazilərin yenidən qurulması üçün bu əməkdaşlıq həyati əhəmiyyət kəsb edir:

"Mən Azərbaycan Milli Şəhərsalma Forumunda iştirak edərkən yenidənqurma işlərinə icmaların və maraqlı tərəflərin necə fəal cəlb olunduğunun şahidi olmaqdan böyük məmnunluq duydum" - deyə o bildirib.