Dövlət İmtahan Mərkəzinin (DİM) təqdim etdiyi bir sıra sertifikat və şəhadətnamələr vətəndaşların Elektron Hökumət İnformasiya Sistemindəki elektron kabinetləri (mygov ID) vasitəsilə təqdim olunacaq.
DİM-dən NTV-yə bildirilib ki, bununla bağlı müvafiq normativ hüquqi akt layihəsi Azərbaycan Respublikası Nazirlər Kabinetinin 2026-cı il 15 may tarixli 150 nömrəli Qərarı ilə təsdiq edilib.
Qeyd olunub ki, məqsəd vətəndaşlara göstərilən xidmətlərin tam elektronlaşdırılması, kağız daşıyıcılardan imtina edilməklə xidmətlərin səmərəliliyinin artırılması və “rəqəmsal hökumət”ə keçid prosesinin sürətləndirilməsidir. Qərara əsasən, elektron kabinetlər (mygov ID) vasitəsilə təqdim ediləcək sənədlər sırasına elektron dövlət qulluğuna qəbul və dövlət qulluğunda fəaliyyətin davam etdirilməsi sertifikatları daxildir.
Bununla yanaşı, peşəkar mühasib sertifikatları, aqrar sığorta fəaliyyəti üzrə müstəqil ekspert sertifikatları, sığorta fəaliyyəti üzrə müstəqil ekspert sertifikatları, həmçinin qiymətləndirmə fəaliyyəti ilə məşğul olmaq üçün ixtisas şəhadətnamələri də elektron formada təqdim olunacaq.
Elektron qaydada təqdim ediləcək sənədlər arasında ümumi istifadədə olan avtomobil nəqliyyatı ilə ölkədaxili sərnişin və yük daşımalarını həyata keçirən sürücülərin peşə fəaliyyətinə dair xüsusi hazırlığın qiymətləndirilməsinin nəticələrinə dair şəhadətnamələr də yer alır.
Bildirilib ki, şəhadətnamələr DİM-in səlahiyyətli şəxsi tərəfindən təkmil sertifikatlı gücləndirilmiş elektron imza ilə təsdiqlənəcək və elektron sənəd formasında vətəndaşların mygov ID kabinetlərinə göndəriləcək.
Sənədlərin üzərində yerləşdirilən QR-kod vasitəsilə onların həqiqiliyinin real vaxt rejimində yoxlanılması mümkün olacaq. Vətəndaşlar həmçinin bu sənədləri elektron qaydada paylaşa, zəruri hallarda isə çap edə biləcəklər.
NTV canlı
Radio canlı
Nuhçıxan