KİV: İsrail Qəzza tunellərini dəniz suyu ilə doldurmağı planlaşdırır

İsrail hakimiyyəti Qəzza zolağında Fələstin HƏMAS hərəkatının yaraqlılarının gizləndiyi yeraltı tunellər sistemini dəniz suyu ilə doldurmaq imkanını nəzərdən keçirir.

NUHÇIXAN xəbər verir ki, bu barədə “The Wall Street Journal” ABŞ administrasiyasındakı mənbələrə istinadən məlumat yayıb.

Qeyd edilib ki, bu, ekoloji fəlakətə gətirib çıxara və anklavda şirin su ilə bağlı vəziyyəti daha da pisləşdirə bilər.

Nəşrin məlumatına görə, İsrail Müdafiə Qüvvələri noyabrın ortalarında Əl-Şati qaçqın düşərgəsi yaxınlığında beş nasos stansiyasının quraşdırılmasını başa çatdırıb. Bu qurğular Aralıq dənizindən saatda minlərlə kubmetr su çəkərək tunelləri bir neçə həftə ərzində su basmağa qadirdir.

İsrail hakimiyyəti hələlik belə bir mümkün addımla bağlı yekun qərar verməyib, əlavə olaraq Tel-Əvivin bu ehtimalla bağlı məlumat verdiyi ABŞ Prezidenti Cozef Bayden administrasiyasında da fikir ayrılığı var.

Qəzet qeyd edir ki, tunellərin dəqiq sukeçirmə dərəcəsinin bəlli olmadığını nəzərə alsaq, onları daşqın etmək cəhdinin torpağa və qrunt sularına təsirini hesablamaq, anklavda su təchizatı və kanalizasiya sistemlərinin taleyinin necə olacağını öyrənmək, demək olar ki, mümkün deyil. Bundan əlavə, daşqın nəticəsində çox güman ki, tunellərdə yerləşən təhlükəli maddələrin torpağa daxil olması ehtimalı var.

“The Wall Street Journal” yazır ki, belə bir tədbir Bayden və onun administrasiyasını çətin vəziyyətə sala və bütün dünyanın qınağına səbəb ola bilər.